کولمبو۔23فروری(اے پی پی)وزیراعظم عمران خان آکھیے جو پاکستان اتے سری لنکا کوں دہشتگردی دے ہکو جھیں چیلنجز ہین، ترقی کیتے رل مل تے ٹرݨا ہوسی، سری لنکا وی پاکستان اچ سی پیک منصوبیاں توں فیدہ چاوے۔ اے ڳآلھ انہاں کولمبو اچ ݙوہاں ملکاں وچال مختلف معاہداں دی یادداشتاں تے دستخط توں بعد میݙیا نال الیندے آکھی۔ انہاں سری لنکا دا دورہ کرݨ دی دعوت ݙیوݨ اتے چنڳی مہمانداری تے سری لنکن وزیراعظم دا شکریہ ادا کیتا۔ انہاں آکھیا جو پاکستان اتے سری لنکا مل تے ترقی دا پندھ کر سڳدن۔ سری لنکن وزیراعظم وزیراعظم مہندا راجہ پاکسے آکھیا جو ݙوہاں ملکاں اپݨی ڳالھ مہاڑ اچ جنوبی ایشیا اچ پائیدار ترقی کیتے کردار ادا کرݨ تے اتفاق کیتے۔ وزیراعظم عمران خان آکھیا جو میں سری لنکا دے پہلے دورے تے اپݨے دور کرکٹ اچ آیا ہم، سری لنکن ٹیم کوں ٹیسٹ سٹیٹس ݙیواوݨ کیتے کردار وی یاد اے، ݙوہاں ملکاں کوں ہکو جھیں چیلنجز ہین، اساں دہشتگردی دے مسائل نال نبڑیے ہیں، سری لنکا سیاحت دے شعبہ اچ ترقی کیتی اے بھل دہشت گردی اتے امن و امان پاروں ایندی سیاحت متاثر تھئی اے۔ وزیراعظم آکھیا جو پاکستان چینی صدر دے ون بیلٹ پروگرام دا حصہ اے، سی پیک فلیگ شپ پروگرام اے جیڑھا علاقائی روابط کیتے اہم اے، سری لنکا مستقبل اچ سی پیک نال وسط ایشیا نال روابط دا فیدہ چا سڳدے۔ اساں مشترکہ مسائل، کورونا دی صورتحال، ایندے ترقی پذیر اتے غریب ممالک تے اثرات دا الوائے، کرونا نال غریب ملک ٻہوں متاثر ہین، پر پاکستان بہتر حکمت عملی نال کورونا تے قابو پاتے۔ انہاں سری لنکن ہم منصب کوں دورہ پاکستان دی دعوت ݙتی اتے آکھیا جو سیاحت دے ودھارے کیتے بدھسٹ ٹرین شروع کریسوں، سری لنکا دے سیاح وی خوشی نال آون۔ انہاں آکھیا جو سری لنکا نال مختلف شعبیاں سودھا سیاحت اتے ہوا بازی دے شعباں اچ تعاون ودھاوݨ تے اتفاق تھئے۔
