اسلام آباد۔23نومبر (اے پی پی) نگران وزیراعظم انوار الحق کاکڑ آکھیا جو ملک اچ قدرتی آفات دی پیش گوئی، ایندے نال نبڑݨ اتے انہاں دےاثرات ڳھٹ کرݨ کیتے این ڈی ایم اے اتے این ای او سی دے کم تعریف دے قابل ہن۔ این ڈی ایم اے استعداد کار ودھاوݨ کیتے صوبائی اداریاں دی مدد کرے۔ کوپ۔28 اچ پاکستان موسمیاتی تبدیلی دے اثرات دے نال نال دنیا کوں آپݨے تجربے بارے وی ݙسیسی۔ وزیراعظم آفس دے میڈیا ونگ توں جاری بیان موجب نگران وزیرِ اعظم انوار الحق کاکڑ خمیس کوں نیشنل ایمرجنسی آپریشن سنٹر (این ای او سی) دا دورہ کیتا جتھ وزیرِ اعظم کوں پاکستان دی ملک اچ آفات نال نبڑݨ بارے تیاریاں، آفات دے بعد بحالی دے کم اتے متحدہ عرب امارات اچ تھیوݨ آلی 28ویں اقوام متحدہ کانفرنس آف پارٹیز اجلاس (کوپ۔28) اچ پاکستان دی نمائندگی بارے تجویزاں ݙتی ڳئی۔ نگران وفاقی وزرا جلیل عباس جیلانی، ڈاکٹر شمشاد اختر اتے متعلقہ حکام وی بریفنگ اچ موجود ہن۔ اجلاس اچ چیئرمین نیشنل ڈیزاسٹر مینجمنٹ اتھارٹی لیفٹیننٹ جنرل انعام حیدر ملک شرکاء کوں بریفنگ ݙتی۔
