اسلام آباد۔30جولائی (اے پی پی) صدرمملکت ڈاکٹرعارف علوی آکھیا جو پاکستان رابطہ کاری دے موثرڈھانچہ دے زریعہ انسانی سمگلنگ دی عفریت دے خلاف مہم اچ پرعزم اے۔ صدرمملکت اے ڳالھ سمگلنگ دے خلاف اقدامات بارے جڳ عالمی ݙینھ دے موقع تے آپݨے سنیھے اچ آکھی۔ صدر مملکت آکھیا جو پاکستان بین الاقوامی معیار دے مطابق قانونی فریم ورک دے نفاذ نال انسانی سمگلنگ دے خلاف سخت اقدامات شروع کیتن۔ پاکستان افراد خصوصاً تریمتیں اتے ٻالاں دی اسمگلنگ کوں روکݨ اتے اوں نال نبڑݨ کیتے ٹریفکنگ ان پرسن ایکٹ 2018 نافذ کیتے۔ ایں قانون نال غیر قانونی کم کرݨ آلیاں کیتے ݙاہ سال تئیں قید دی سزا ݙتی ڳئی اے۔ صدرمملکت آکھیا جو وزیرداخلہ دی قیادت اچ انسانی سمگلنگ دے تدارک کیتے قومی رابطہ کمیٹی وی ٻݨائی ڳئی اے۔ اے کمیٹی انسانی سمگلنگ دی ساری صورتاں اتے سیکس ٹریفیکنگ دے خلاف قومی کوششاں کوں اڳوں ودھاوݨ دی ذمہ وار اے۔
