اسلام آباد-04 آڪٽوبر (اي پي پي) سينيٽ چيئرمين سيد يوسف رضا گيلاني چيو آهي ته پاڪستان جي آئين ۾ 63 اي کي ضياءُ الحق داخل ڪرايو هو، اسان جي پارٽي جمهوريت کي هٿي ڏيڻ لاءِ حياتين جون قربانيون ڏنيون آهن. مون چارٽر آف ڊيموڪريسي تي عملدرآمد ڪرايو ۽ 2/58 بي کي اسان ئي ختم ڪرايو هو. سينيٽ چيئرمين سيد يوسف رضا گيلاني ڊاڪٽر ناصر حسين بخاري جي ڪتاب جي مهورتي تقريب کي خطاب ڪندي چيو ته ڊاڪٽر ناصر حسين بخاري کي محبت سان ڀرپور ڪتاب لکڻ تي مبارڪون ڏيان ٿو، مختصر ڪهاڻين جو هي مجموعو واکاڻ جوڳو آهي. سيد يوسف رضا گيلاني چيو ته ادب ذريعي معاشري ۾ عدم برداشت کي ختم ڪري سگهجي ٿو. آئون پاڻ هڪ ڪتاب جو ليکڪ آهيان. مون عوام جي خدمت ۾ جيل ڪاٽيو آهي مون غريبن کي نوڪريون ڏنيون، نيب مون کي جيل ۾ وڌو مون کي ان تي ڪو به افسوس ناهي. هن چيو ته پاڪستان جي آئين ۾ 63 اي کي ضياءُ الحق داخل ڪرايو هو، اسان جي پارٽي جمهوريت کي هٿي ڏيڻ لاءِ حياتين جون قربانيون ڏنيون آهن. مون چارٽر آف ڊيموڪريسي تي عملدرآمد ڪرايو آهي ۽ 2/58 بي کي اسان ئي ختم ڪرايو هو، ملڪ جي خدمت ڪرڻ اسان جو اولين فرض ۽ ترجيح آهي ۽ عوامي خدمت لاءِ اسان کي جيل کان ڊپ نٿو لڳي. سينيٽ چيئرمين چيو ته جنهن جج مون کي نااهل ڪيو هو، مون کي ان فون ڪيو ته اوهان کي منهنجي ڌيءَ جي شادي ۾ اچڻو آهي، مون چيو ته ڌيئرون سڀني جون هڪجهڙيون هونديون آهن ۽ مون شرڪت پڻ ڪئي.اسان جو جنهن خاندان سان تعلق آهي ان جو ڪم سياست ناهي تبليغ ۽ امن جو پيغام ڏيڻ آهي. هن ڪتاب جي مهورتي تقريب جي سلسلي ۾ چيو ته علم ۽ ادب جي اهميت کي ڪنهن به دور ۾ گهٽ يا نظر انداز نٿو ڪري سگهجي. علم ۽ ادب ذريعي ئي اسان زندگي جي مشڪلاتن ۽ آزمائشن جو مقابلو ڪري سگهون ٿا ۽ علم ۽ ادب اسان جي تاريخ جو رڪارڊ هوندو آهي. سينيٽ چيئرمين چيو ته ڪهاڻيون، شاعري ۽ نثر ذريعي ئي اسان پنهنجي سڃاڻپ کي محفوظ ۽ تبديلي کي اڳتي وڌائيندا آهيون. ادب ئي اسان کي پنهنجي چوڌاري جي دنيا جو احساس ڏيارڻ ۾ مدد ڪري ٿو، بهتر مستقبل جي تعمير لاءِ اعليٰ تعليم اڻٽر آهي. سيد يوسف رضا گيلاني ڊاڪٽر ناصر حسين بخاري جي ادبي ۽ غير معمولي لکڻي واري ذهانت کي خراج تحسين پيش ڪيو ۽ ڊاڪٽر ناصر حسين بخاري کي شاندار ڪاميابي تي دلي مبارڪون ڏنيون. سيد يوسف رضا گيلاني چيو ته اهڙيون تقريبون اسان کي معاشري ۾ ادب جي لازوال اهميت کي ياد ڏيارين ٿيون. هن چيو ته ڊاڪٽر ناصر حسين بخاري جون ڪهاڻيون اسان کي هڪ اهڙي معاشري جو تصور ۽ جدوجهد ڪرڻ جي ترغيب ڏين ٿيون جتي اسان جا جواب حقيقت بڻجن. هن چيو ته ڊاڪٽر ناصر ڪتابن جي رائلٽي بابت ڳالهه ڪئي آهي ۽ آئون اوهان کي يقين ڏياريان ٿو ته آئون ذاتي طور تي ان معاملي کي ڏسندس. سينيٽ چيئرمين سيد يوسف رضا گيلاني چيو ته ليکڪن جي حقن جي تحفظ لاءِ ان کي مناسب فورم تي اٿاريندس.
