اسلام آباد – 08 – آڪٽوبر (اي پي پي) ڪابينا جي توانائي بابت ڪميٽي (سي سي او اي) جو اجلاس منصوبابندي، ترقي ۽ خصوصي قدمن واري وفاقي وزير اسد عمر جي صدارت ۾ پارليامينٽ هائوس ۾ ٿيو. اجلاس ۾ نون ٽرمينلز جي قيام جي حوالي سان بين الوزارتي ڪميٽي جي رپورٽ جي بنياد تي بحري معاملن واري وزارت سمري پيش ڪئي، سي سي او سي سمري جو تفصيلي جائزو وٺي پائپ لائين جي ڪيپسٽي ايلوڪيشن جي منظوري ڏئي ڇڏي، اسد عمر هدايت ڪئي ته نئين ايل اين جي ٽرمينلز جي قيام تي ڪم جي رفتار کي تيز ڪيو وڃي. پاور ڊويزن پاڪستان اليڪٽرانڪ پاور ڪمپني جي ري اسٽرڪچرنگ جي سمري اجلاس ۾ پيش ڪئي ۽ ڪابينا جي توانائي بابت ڪميٽي ان جي منظوري ڏئي ڇڏي. سي سي او اي چيو ته بحالي جي منصوبي تي عملدرآمد کي 31 ڊسمبر 2021ع تائين مڪمل ڪيو وڃي ۽ انساني وسيلن جي حوالي سان نئين انتظاميه جون خدمتون جلد حاصل ڪيون وڃن. اجلاس جي دوران پاور ڊويزن جي آر ايل اين جي پلانٽس جي آپريشنز جي سمري تي به غور ڪيو ويو. ڪميٽي هدايت ڪئي ته آر ايل اين جي جي درآمد جي ڪري پيش ايندڙ مسئلن جو خاتمو يقيني بڻايو وڃي، ڪميٽي هدايت ڪئي ته ان حوالي سان توانائي وارو وزير، اوگرا ۽ نيپرا جي عملدارن سان اجلاس ڪري ۽ مسئلن جي حل جون تجويزون سي سي او اي جي ايندڙ اجلاس ۾ پيش ڪيون وڃن، ڪميٽي آگسٽ 2021ع جي لاءِ پاور ڊويزن پاران جمع ڪرايل گردشي قرضن جي رپورٽ جو جائزو ورتو ۽ گذريل 12 مهينن دوران گردشي قرضن ۾ صرف 57 ارب روپين جي اضافي تي اطمينان جو اظهار ڪيو. واضح رهي ته گذريل حڪومت جي دور ۾ گردشي قرضن جو ساليانو ماپو 450 ارب روپيا هو، اجلاس ۾ ناڻي وارو وفاقي وزير، توانائي وارو وفاقي وزير، بحري معاملن وارو وفاقي وزير، واپار وارو صلاحڪار، سي پيڪ جي حوالي سان وزيراعظم جو خاص مددگار ۽ لاڳاپيل ريگوليٽري ادارن سميت ٻين وزارتن ۽ ڊويزنن جي اعليٰ عملدارن به شرڪت ڪئي.
