ریاض۔29اپریل (اے پی پی):وزیراعظم محمد شہباز شریف آکھیے جو پاکستان تے سعودی عرب دے معاشی تعلقات نویں دور اچ داخل تھی چکئن ݙوہیں ملکاں وچال تجارت دا حجم ودھاوݨ سانڳے اقدامات کیتے ویسن ،خصوصی سرمایہ کاری سہولت کونسل ٻاہرلی سرمایہ کاری دے ودھارے تے سرمایہ کاراں کوں سہولتاں ݙیوݨ سانڳے پوری طرح فعال اے ۔ انہاں اے ڳالھ سنوار کوں سعودی عرب دے وزیر تجارت ماجد القصبی کوں آکھی جنہاں عالمی اقتصادی فورم دے خصوصی اجلاس دے موقع تے انہاں دے نال ملاقات کیتی ۔ ملاقات اچ وفاقی وزیر خزانہ و محصولات محمد اورنگزیب ، وفاقی وزیر تجارت جام کمال خان ، وفاقی وزیر اطلاعات و نشریات عطا اللہ تارڑ ، وفاقی وزیر پٹرولیم مصدق ملک تے وزیراعظم دے معاون خصوصی طارق فاطمی وی موجود ہن ۔ وزیراعظم آکھیے پاکستان اتے سعودی عرب دے معاشی تعلقات ھک نویں دور اچ داخل تھی ڳئن ۔ آندے ݙینھاں اچ ݙوہیں ملکاں وچال تجارت دا حجم ودھاوݨ دے حوالے اقدامات چاتے ویسن ، پاکستان اچ خصوصی سرمایہ کاری سہولت کونسل ٻاہرلی سرمایہ کاری ودھاوݨ تے سرمایہ کاراں کوں سہولتاں ݙیوݨ سانڳے پوری طرح فعال اے ۔وزیراعظم آکھیے سعودی عرب دی ترقی و خوشحالی اچ پاکستانیاں دا کردار اہم رہیے۔ سعودی وزیر تجارت آکھیے ولی عہد اتے وزیر اعظم شہزادہ محمد بن سلمان دی واضح ہدایات موجب اساں پاکستان کوں سرمایہ کاری اتے تجارت دے حوالے نال ترجیح ݙیندے پیوں، سعودی کاروباری و تاجر برادری اتے سرمایہ کاراں دا وفد وختی پاکستان دا دورہ کریندا پئے انہاں آکھیے آندے ھک توں ݙڈھ سال اچ ݙوہیں ملکاں دے معاشی اتے تجارتی تعلقات کوں اڳوں گھن ونڄݨ سانڳے اہداف دا تعین کیتا ویندا پئے ۔ انہاں ݙوہیں ملکاں دے نینگراں تے نویں نسل اچ سعودی پاکستان دوستی دے حوالے نال جذبات مزید اجاگر کرݨ دی لوڑھ اے
