اسلام آباد۔2جولائی(اے پی پی)وزیرِ اعظم محمد شہباز شریف ساوݨ اچ سارے متعلقہ اداریاں کوں ہر ویلھے تیار رہݨ دی ہدایت کریندے ہوئے کہیں وی ہنگامی صورتحال نال نمٹݨ کیتے اعلی ٰسطح کمیٹی ٻݨا ݙتی۔ او اسلام آباد اچ مون سون دی پیشگوئی اتے ایندے نال آوݨ آلی ہنگامی صورتحال نال نمٹݨ کیتے تھیوݨ آلے جائزہ اجلاس دی اڳواݨی کریندے پئے ہن۔ اجلاس اچ وفاقی وزرا احد خان چیمہ، عطا اللہ تارڑ، رانا تنویر حسین، چیئرمین این ڈی ایم اے لیفٹیننٹ جنرل انعام حیدر ملک اتے متعلقہ اعلی حکام شرکت کیتی۔ اجلاس اچ چارے صوبیاں دے چیف سیکرٹریز وڈیولنک تے شرکت کیتی۔ وزیراعظم مون سون اتے چھل دی ممکنہ صورتحال دی آپ نگرانی کرݨ دا فیصلہ کریندے سارے متعلقہ اداریاں کوں الرٹ رہݨ دا آکھیے جو این ڈی ایم اے صوبائی حکومتاں و متعلقہ اداریاں دا ہتھ ونݙاوے، بارشاں دی پیشگی اطلاع، متاثرہ علاقیاں اچ ریلیف و بحالی کیتے اقدامات کیتے ونڄن۔ وزیر اعظم ہدایت کیتی جو مون سون بارے پیشگی اطلاعات کوں قومی نشریات دا حصہ ٻݨایا ونڄے، کساناں کوں موسم دی روزانہ صورتحال ݙسیڄے اتے کہیں وی ہنگامی صورتحال اچ ہتھ ونݙایا ونڄے۔ اجلاس اچ موسمی صورتحال، مون سون دی علاقہ وار شدت اتے ایں سانڳے اقدامات تے بریفنگ ݙتی ڳئی۔ اجلاس اچ دریاواں دی صورتحال، ریسکیو اقدامات، امدادی سامان دی فراہمی تے وی بریفنگ ݙتی ڳئی۔
