اسلام آباد۔5دسمبر(اے پی پی) صدر مملکت ڈاکٹر عارف علوی تریمتاں کوں ہراسیت توں پاک ماحول ݙیوݨ سانڳے اجمتاعی کوششاں تے زور ݙیندے ہوئیں آکھیے جو تریمتاں کوں ہراساں کرݨ آلا ماحول تے رویے کوں بدلݨا ہوسی ، عوامی جہیں بمقام کارتے گھراں اچ وی ساز گار ماحول یقینی بݨاوݨا ہوسی ۔او منڳل کوں وفاقی محتسب انسداد ہراسیت بمقام کار دے زیر اہتمام تقریب توں خطاب کریندے پئے ہں ۔ خاتون اول بیگم ثمینہ علوی، وفاقی محتسب انسداد ہراسیت فوزیہ وقار، ڈپٹی گورنر سٹیٹ بینک سلیم اللہ، مختلف ملکاں دے سفارتکاراں تے انسانی حقوق دیاں تنظیماں دے نمائندے تقریب اچ شریک ہن ۔ صدر مملکت ڈاکٹر عارف علوی تقریب توں خطاب کریندے ہوئیں آکھیے مغربی معاشرے اچ ٻہوں دیر بعد تریمتاں دے حقوق دی ڳالھ تھئی اے ، 1400سال پہلے حضورﷺ اتے قرآن پاک تریمتاں دے حقوق ݙسا ݙتے ہن ۔ جے مغرب دے نال موازنہ کروں اساں تریمتاں دا او وںڄا ہویا مقام ولا گھنݨ سانڳے کوشاں ہیسے جیڑھا جو 1400سال پہلے قرآن و سنت تریمتاں کوں ݙتا ہئی ۔ صدر مملکتمولانا محمد علی جوہر تے شوکت علی دی والدہ‘اماں بی دا کردار ݙیکھوں یا یا قائداعظم محمد علی جناح دا رتی جناح کوں رلے گھن تے چلݨ ،قیام پاکستان دے بعد محترمہ فاطمہ جناح اتے پاکستان دی سیاست اچ بے نظیر بھٹو جییہاں تریمتاں دا کردار نمایاں نظر آندے ۔ پاکستان دے اندر ارتقائی عمل جاری اے ویلھے دے نال نال تریمتاں دا مقام اُچا تھیندا چلیا آئےانہاں آکھیے جو کہیں وی شعبے کوں ٹھیک کرݨ سانڳے ٻہوں ساریاں مالی ضرورتاں ہوندن لیکن تریمتاں کوں با اختیار بݨاوݨ سانڳے اساکوں صرف آپݨے رویں اچ تبدیلی دی لوڑھ اے ۔ صدر مملکت ڈاکٹر عارف علوی آکھیے تریمتاں کوں ہراساں تھیوݨ توں بچاوݨ سانڳے صرف 16 ݙینھ کافی کائنی ۔ تریمتاں کوں ہراسیت توں بچاوݨ ، بااختیار بݨاوݨ بریسٹ کینسر کوں روکݨ ، ذہنی بیماریاں توں بچاوݨ تے خصوصی لوکاں دے حقوق سانڳے اساکوں مسلسل پیغام پڄاوݨا ہوسی ایندی مثال اساں کنے کوویڈ 19 دی اے‘ایندی وباء دے دوران پاکستان بہترین حکمت عملی اختیار کیتی، ماسک پاوݨ ‘ فاصلے رکھݨ تے احتیاطی تدابیر سانڳے ہر گھر تئیں پیغام پڄایا جیں دے ثمرات آئے اتے پاکستان دنیا دے انہاں پنج ملکاں اچ شامل اے جیں گھٹ جانی ضیان نال کوویڈ 19تے قابو پاڳھدا ۔تقریب اچ زندگی دے مختلف شعبیں نال تعلق رکھݨ آلیاں تریمتاں دی عملی زندگی‘ بمقام کار خدمات دے دوران پیش آوݨ آلی مشکلات اتے موثر انداز نال متعلقہ پلیٹ فارم تے آواز چاوݨ تے مشتمل کامیابیاں تے مشتمل دستاویزی فلم وی ݙکھائی ڳئی جیں دی شرکاء تقریب تعریف کیتی۔
