اسلام آباد۔10اکتوبر(اے پی پی) نائب وزیراعظم تے وزیر خارجہ سینیٹر محمد اسحاق ڈار آکھیے پاکستان معاشی بحالی تے ترقی دے سفر تے ٹردا پئے ، ملک کوں غیر ملکی سرمایہ کاری سانڳے مزید پرکشش بݨیندے پیوں ، حکومت سرکاری اداریں اچ اصلاحات تے عوامی خدمات سودھے ٻئے امورکوں بہترکریندی پئی اے ۔ نائب وزیراعظم اے ڳالھ اتھاں پاک سعودی عرب بزنس فورم توں خطاب کریندے آکھی ۔ فورم اچ اعلیٰ سطح دے سعودی وفد دا پرتپاک خیرمقدم کیتا ڳئے جیں دی قیادت سعودی عرب دے وزیر سرمایہ کاری خالد بن عبدالعزیز الفالح کریندے پئن ، وفد اچ سرکاری تے نجی شعبیں دے نمائندے شامل ہن۔ سعودی عرب دا وفد پاکستان اچ سرمایہ کاری دے موقع ڳولݨ تے مختلف شعبیں اچ مفاہمت دی یادداشتاں تے دستخط کرݨ سانڳے پاکستان وچ اے ۔ نائب وزیراعظم شرکاء توں خطاب کریندے پاکستان تے سعودی عرب دے درمیان تاریخی تعلقات تے گھاٹی یاری دا ذکر کیتا تے آکھیے جو ݙوہیں ملکاں وچال تعلقات مشترکہ مذہبی رشتے، اقدار تے علاقائی استحکام دے عزم تے مبنی ہن۔ انہاں آکھیے سعودی وفد دا اے دورہ ھک اہم وقت تے تھیندا پئے جݙاں پاکستان معاشی بحالی اتے ترقی دے سفر تے ٹردا پئے ، انھاں آکھیے پاکستان اچ کلیدی اصلاحات دا مقصد نجی سرمایہ کاری کوں ودھارا ݙیوݨ تے عوامی خدمات کوں ودھاوݨا اے۔ نائب وزیراعظم آکھیے پاکستان دا نواں اقتصادی پروگرام جیں کوں آئی ایم ایف دی حمایت حاصل اے، سوکھے محرک توں ہٹ تے ماضی دی پالیسیاں توں تبدیلی دی نمائندگی کریندے ۔ سینیٹر محمد اسحاق ڈار آکھیے اے پیداواری صلاحیت، مسابقت ودھاوݨ تے نجی سرمایہ کاری دے موقع پیدا کرݨ سانڳے اصلاحات تے توجہ ݙیندے ۔ انہاں آکھیے حکومت سرکاری اداریں اچ اصلاحات تے عوامی خدمات سودھے ٻئے امور بہتر کریندی پئی اےجݙاں جو میکرو اکنامک پالیسیاں بشمول شرح مبادلہ تے افراط زر کوں کنٹرول کرݨ دیاں کوششاں معیشت مستحکم کرݨ اچ معاون ثابت تھیندیاں پئن۔ نائب وزیراعظم آکھیے اوکھے فیصلیں دے باوجود اے تبدیلیاں پہلے ہی مثبت نتیجے ݙیندیاں پئن جنہاں اچ افراط زر اچ کمی، پاکستان کوں غیر ملکی سرمایہ کاری سانڳے مزید پرکشش بݨاوݨ تے مستقبل سانڳے ھک تکڑے ، زیادہ مستحکم معیشت دی تعمیر شامل اے۔ نائب وزیراعظم کان کنی، انفارمیشن ٹیکنالوجی، زراعت اتے قابل تجدید توانائی دے شعبیں اچ پاکستان دی صلاحیتاں دا ذکر کریندے سعودی سرمایہ کاراں کوں انھاں منافع بخش موقع اچ شرکت دی دعوت ݙتی۔ سینیٹر محمد اسحاق ڈار یقین ظاہر کیتے سعودی عرب دے اعلی سطح دے وفد دا دورہ اتے ایندے مصروفیات ٹھوس نتیجے دا باعث بݨسن جیں توں ݙوہیں ملکاں وچال اقتصادی شراکت داری مزید تکڑی تھیسی ۔ تقریب توں سعودی عرب دے وفد اچ شامل وزیر سرمایہ کاری اتے پاکستان اچ سعودی عرب دے سفیر نواف بن سعید المالکی وی خطاب کیتا
