اسلام آباد۔11اپریل(اے پی پی)نومنتخب وزیراعظم شہباز شریف آکھیے جو پارلیمنٹ دی قومی سلامتی کمیٹی اچ مسلح افواج دے سربراہان اتے ڈی جی آئی ایس آئی دے ہوندے خط دے معاملے تے ان کیمرہ بریفنگ ݙتی ونڄے، جیکر ایندے اچ ساݙا ملوث ہوݨ ملیا تاں عہدہ چھوڑ ݙیساں، برطانیہ، امریکہ و یورپی یونین نال ساݙے تجارتی و اقتصادی تعلقات ہین، اساں بھارت نال چنڳے تعلقات چاہندے ہیں، مسئلہ کشمیر دے حل تئیں خطے اچ پائیدار امن نئیں آسڳدا، جمہوریت اتے معیشت کوں تکڑا کرݨ کیتے ڈائیلاگ اتے مفاہمت کوں ودھاوݨا ہوسی، پنشنرز کوں فوری ریلیف ݙیوݨ کیتے سول اتے آرمی دے پنشنرز دی پنشن اچ یکم اپریل توں 10 فیصد ودھارا تھیسی، نجی شعبہ وی ہک لکھ تک تنخواہ وصول کرݨ آلے اپݨے ملازمین دی تنخواہ ݙاہ فیصد ودھاوے، بطور خادم پاکستان چارے صوبیاں کوں رلا تے ٹرساں اتے پورے ملک کوں ہکو سویں ترقی دے رستے تے ستیسوں۔ قومی اسمبلی اچ نواں وزیراعظم ٻݨم توں بعد خطاب اچ انہاں آکھیا جو اڄ دا ݙینھ ہک وݙا ݙینھ اے اڄ ہک نویں دور دی شروعات تھیندی پئی اے، ڄݙاں عدالت نظریہ ضرورت کوں دفن کیتے اوکوں خراج تحسین پیش کرینداں اتے ساکوں ایندے تے آئین دی سربلندی دا ݙینھ مناوݨا چاہیدے، مسلم لیگ ن اتے ٻیاں جماعتاں رل تے تحریک عدم اعتماد فیصلہ ٻہوں پہلے کر چکیاں ہن جیندے بعد خطا دا ݙرامہ بلا جواز اے بھل ایندے تے ان کیمرہ بریفنگ تھیسی اتے سب کھیر پاݨی نتر آسی اتے اے بحث ہمیشہ کیتے مک ویسی۔ انہاں آکھیا جو سرمایہ کاری کیتے پاکستان کوں شاندار ملک ٻݨیسوں، نوجوان نسل کوں انتہا پسندی توں بچاوݨ کیتے ٻئے لیپ ٹاپ ݙیسوں، بے نظیر انکم سپورٹ پروگرام ولا آسی، پیڈ انٹرن شپ پرگرام کوں جدت ݙیسوں۔
