اسلام آباد۔13اگست(اے پی پی)وزیراعظم محمد شہباز شریف آکھیے جو بجلی چوری روکݨ، لائن لاسز ڳھٹاوݨ اتے ترسیلی نظام اچ بہتری حکومتی اصلاحاتی ایجنڈے دا حصہ ہین، بجلی ونݙݨ آلیاں کمپنیاں اچ اصلاحات دے بعد انہاں دی آؤٹ سورسنگ اتے نجکاری کیتی ویسی۔ وزیر اعظم شہباز شریف نال بجلی ونݙݨ آلیاں کمپنیاں (ڈسکوز ) دے نویں لڳݨ آلے چیئرمین اتے بورڈ ممبران ملین۔ ملݨ آلیاں اچ لاہور الیکٹرک سپلائی کمپنی، اسلام آباد الیکٹرک سپلائی کمپنی، فیصل آباد الیکٹرک سپلائی کمپنی، ملتان الیکٹرک پاور کمپنی اتے ہزارہ الیکٹرک سپلائی کمپنی دے عہدیداران شامل ہن۔ وزیر اعظم اے تعیناتیاں میرت تے مکمل کرݨ تے مبارک ݙیندے امید کیتی جو نویں تعینات عہدیداران نویاں ذمہ داریاں کوں قومی خدمت سمڄھیندے فرائض ںبھیسن اتے بجلی چوری روکݨ، لائن لاسز ڳھٹاوݨ اتے ترسیلی نظام اچ بہتری سانڳے حکومتی اصلاحاتی ایجنڈے دی تکمیل کیتے پورا ہتھ ونݙیسن۔ انہاں آکھیا جو ڈسکوز اچ گورننس تے توجہ دی لوڑھ اے اتے ایں سانڳے بجلی تقسیم کار کمپنیاں دی ڈیجیٹلائزیشن سودھا کسٹمر سروسز بہتر ٻݨاوݨیاں ہوسن۔ ملݨ ویلھے وفاقی وزیر اقتصادی امور احد خان چیمہ، وفاقی وزیر نجکاری عبد العلیم خان، وفاقی وزیر خزانہ و محصولات محمد اورنگزیب، وفاقی وزیر پاور اویس احمد خان لغاری، وزیراعظم دے معاون خصوصی برائے پاور محمد علی، وزیراعظم دے کوآرڈینیٹر رانا احسان افضل اتے متعلقہ اعلیٰ سرکاری افسران وی موجود ہن۔
