اسلام آباد-12 سيپٽمبر (اي پي پي) بچاءَ واري وفاقي وزير خواجه محمد آصف چيو آهي ته افغانستان سان ڪي پي ڪي جي وڏي وزير جو بيان وفاق تي حملو آهي، ڪو صوبو ڪنهن ٻئي ملڪ سان سڌيءَ ريت ڳالهيون نٿو ڪري سگهي، ماضيءَ ۾ تنگ نظريي ۽ انتقام جي ڪاررواين سان اسان جو ڪوبه ميمبر متاثر ٿيڻ بنا رهي نٿو سگهي، افهام ۽ تفهيم جي روايتن جو تسلسلو ضروري آهي. ڪالهه قومي اسيمبليءَ جي اجلاس ۾ پنهنجن خيالن جو اظهار ڪندي خواجه محمد آصف چيو ته اسپيڪر هڪ اهڙي روايت جي شروعات ڪئي آهي جيڪا تحسين لائق آهي، جيڪڏهن اها روايت اسد قيصر شروع ڪري ها ته اڄ ايوان ۾ ڪاوڙ جو ماحول نه هجي ها. مون کي ڄاڻ آهي ته اسپيڪر ڪنهن کان پُڇي نه پر ايوان جي تقدس لاءِ قدم کنيا آهن. اسان جا ساٿي پروڊڪشن آرڊر تي آيا آهن هنن پنهنجو نمائندگيءَ وارو حق ناهي وڃايو، اسان کان ڏينهن ۽ مهينن لاءِ نه پر سالن لاءِ اهو حق کسيو ويو هو، تاريخ جي درستگي ضروري آهي. هن چيو ته شير افضل مروت مون کي ڪجهه دير لاءِ مليو ۽ سندس جماعت ان جي پٺيان پئجي وئي، اهو الميو آهي ته مخالف ڌر جو ڪوبه ميمبر ڪنهن سرڪاري پارٽيءَ جي ماڻهوءَ سان ملي ته سندن پارٽي پٺيان پئجيو وڃي. 1990ع جي ڏهاڪي ۾ پ پ ۽ (ن) ليگ وچ ۾ به وڇوٽيون هيون پر شام جو گڏجي کائڻ ۽ ويهڻ به ٿي ويندو هو. هن چيو ته ماضيءَ ۾ ڏسڻ گهرجي ته انهن چئن سالن ۾ قومي اسيمبليءَ جي ميمبرن سان ڇا ٿيو هو. هن چيو ته سياسي ڪارڪن جڏهن ظلم ۽ ناروا سلوڪ جو داستان ٻُڌائي ٿو ته سندس عزت متاثر ٿيندي آهي. سياسي ڪارڪن کي ظلم ۽ ڏاڍ تي ڪنڌ اوچو ڪري ان کي سَهڻ ۽ برداشت ڪرڻ گهرجي ۽ دُعا ڪرڻ گهرجي ته اهو سلسلو بند ٿئي، جيڪڏهن اهو سلسلو جاري رهي ته ان سان ملڪ، آئين، قانون ۽ ايوان کي نقصان پهچي ٿو. بچاءَ واري وزير چيو ته اڄ ڪي پي ڪي جي وڏي وزير جو بيان سامهون آيو آهي ته اسان پاڻ افغانستان سان ڳالهيون ڪنداسين، اهو وفاق تي حملو آهي، ڪوبه صوبو ڪنهن ٻئي ملڪ سان سڌيءَ ريت ڳالهيون نٿو ڪري سگهي، اهو سندس چئن ڏينهن جي خطاب جو تسلسل آهي، جنهن رستي هو هلي رهيا آهن ۽ پنهنجي پارٽيءَ کي هلائڻ جي ڪوشش ڪري رهيا آهن اهو زهر قاتل آهي. هن چيو ته اسپيڪر بنا ڪنهن مداخلت جي پنهنجا اختيار استعمال ڪيا آهن. ماضيءَ ۾ تنگ نظري ۽ انتقام جون ڪارروايون ٿي رهيون هيون ان لاءِ اسان جو ڪوبه ميمبر متاثر ٿيڻ بنا رهي نه سگهيو هو. ڇا هُن وقت علي محمد خان ۽ ٻين اڳواڻن آواز بلند ڪيو هو. خواجه محمد آصف چيو ته اسان چاهيون ته اسپيڪر جيڪي قدم کنيا آهن انهن کي تسلسل حاصل ٿئي ۽ مستقبل ۾ به انهن روايتن جو تسلسل رهي. اهي روايتون ماضيءَ ۾ موجود هيون ۽ اسان ان تي عملدرآمد به ڪيو هو پر ڊگهي عرصي تائين ان کي نظر انداز ڪيو ويو، مان واحد ميمبر هئس جڏهن مون تي آرٽيڪل 6 لڳايو ويو ته شفقت محمود جنهن سان منهنجي 56 سال پُراڻي دوستي هئي، مون خلاف پريس ڪانفرنس ڪئي هئي. هن چيو ته زرداري صاحب جي ڀيڻ کي رات 12 وڳي اسپتال مان گرفتار ڪيو ويو هو، اهڙيءَ طرح نواز شريف، شهباز شريف ۽ (ن) ليگ جي ميمبرن ۽ اڳواڻن خلاف انتقامي ڪارروايون ڪيون ويون، اسان جا پروڊڪشن آرڊر روڪيا ويا، اسد قيصر جي روايتن جو تسلسلو نه هئڻ گهرجي. هن چيو ته قانونسازيءَ لاءِ اسان انهن جي گهر به ويا آهيون، اسان انهن سان تعاون ڪيو آهي، اهي اسان کي ان جو طعنو اڄ به ڏئي رهيا آهن پر ڇا اهي ماڻهو ائين ڪري سگهن ٿا.
.jpg)
.jpg)