اسلام آباد-29 سيپٽمبر (اي پي پي) سڄي ملڪ ۾ حضرت محمد ﷺجي ولادت جو جشن مذهبي عقيدت ۽ احترام سان ملهايو ويو. ان موقعي تي سڄي ملڪ ۾ ننڍين وڏين عمارتن کي خوبصورتي سان سجايو ويو ۽ هر طرف روشني ۽ فضا ۾ درود ۽ سلام جو صدائون بلند ٿينديون رهيون. ميلاد مصطفيٰ ﷺجي حوالي سان نعتن جون محفلون جاري رهيون ۽ ملڪ جي ننڍن وڏن شهرن ۾ جلوس ڪڍيا ويا. وفاقي گادي واري هنڌ ۾ سرڪاري، نجي عمارتن ۽ گهرن کي خوبصورتي سان سجايو ويو جڏهن ته سڄي شهر ۾ عيد ميلاد النبي ﷺ جا مختلف جلوس ڪڍيا ويا. اهڙي طرح جماعت اهلسنت ڪراچي تحت مرڪزي جلوس 3 وڳي منجهند جو علامه سيد شاهه عبدالحق قادري ۽ ٻين عالمن جي اڳواڻي ۾ نيو ميمڻ مسجد بولٽن مارڪيٽ مان برآمد ٿيو، جيڪو ايم اي جناح روڊ کان نشتر پارڪ پهتو. جتي اهلسنت ڪراچي جي انتظام هيٺ عظيم الشان جلسو ڪوٺايو ويو. ايسٽ زون ۾ 150 کان وڌيڪ جلوس ۽ محفلون منعقد ڪيون ويون، ٽن ضلعن ۾ پوليس هاءِ الرٽ رهي، ڪورنگي، ملير ايسٽ ۾ سيڪيورٽي جا انتظام سخت ڪيا ويا. 12 ربيع اولا جي مناسبت سان ڏکڻ ضلعي ۾ مرڪزي جلوس ميمڻ مسجد مان ڪڍيو ويو جيڪو نشتر پارڪ تي پڄاڻي تي پهتو، لاهور ۾ ڏينهن جي آغاز تي ايوب اسٽيڊيم ڪينٽ ۾ 21 توپن جي سلامي ڏني وئي، ان موقعي تي فوجي جوانن الله اڪبر جا نعرا بلند ڪيا ۽ ملڪ ۾ امن ۽ سلامتي ۽ استحڪام جون دعائون گهريون ويون، راولپنڊي ۾ به 136 جلوس برآمد ٿيا، عيدميلادالنبي ﷺ جي مرڪزي جلوس طرف ايندڙ رستن کي سيل ڪيو ويو، پشاور ۾ به حضرت محمد ﷺجي ولادت جو جشن ڀرپور مذهبي عقيدت ۽ احترام سان ملهايو ويو، پشاور ۾ 12 ربيع الاول جو مرڪزي جلوس رات 8 وڳي ميلاد چوڪ کان برآمد ٿيو، جيڪو ڪريم آباد پوره بازار، گهنٽا گهر ۽ سبزي منڊي کان ٿيندو قصه خواني تي پهتو، پوليس موجب 12 ربيع الاول تي 1500 کان وڌيڪ پوليس اهلڪارن فرض سرانجام ڏنا، ملڪ جي ٻين حصن وانگر ڪوئيٽا جي مختلف علائقن ۾ 13 ننڍا وڏا جلوس ڪڍيا ويا، جيڪي شهر جي مختلف علائقن کان ٿيندي باچا خان چوڪ تي جمع ٿيا، جلوس جي سيڪيورٽي لاءِ پوليس ۽ ٻين ادارن جا 4 هزار اهلڪار مقرر ڪيا ويا، جلوس لياقت بازار، جنڪشن چوڪ، پرنس روڊ، مسجد روڊ کان ٿيندو منان چوڪ تي هڪ وڳي پڄاڻي تي پهتو. ملتان ۾ عيدميلاد النبي جي سلسلي ۾ مرڪزي ريلي قلعه ڪهنه قاسم باغ کان نڪتي جيڪا گهنٽا گهر چوڪ حسين آگهي بازار کان ٿيندي چوڪ بازار پهچي پڄاڻي تي پهتي، سرگوڌا ۾ سيد حامد علي شاهه مسجد ڪمپني باغ کان مرڪزي جلوس جو آغاز ٿيو جنهن ۾ شهرين وڏي انگ ٽريڪٽر ٽرالين ۽ ڏاند گاڏين تي سوار هئا.
.jpg)
