واشنگٹن۔12اکتوبر (اے پی پی):امریکا دی 2فلاحی تنظیماں پاکستان دے سیلاب توں متاثرہ علاقیں اچ ریلیف تے بحالی دے آپریشنز کیتے 25لکھ ڈالر جمع کرڳھدن ۔پاکستانی سفارتخانے دی طرفوں جاری کیتی ڳئی پریس ریلیز موجب ایں حوالے نال واشنگٹن اچ پاکستان اچ پسماندہ علاقیں دے ٻالاں دی تعلیم اچ مدد ݙیوݨ دی فلاحی تنظیم دا سٹیزن فائونڈیشن تقریب دا انعقاد کیتا جیں اچ 500 توں ودھ پاکستانی امریکی شہریاں تے مخیر حضرات سیلاب متاثرہ علاقیں اچ ریلیف اتے بحالی دے آپریشنز اچ مدد کیتے 25لکھ ڈالر جمع کیتے۔ ایں موقع تے امریکا اچ پاکستان دے سفیر مسعود خان مہمان خصوصی ہن ۔ پریس ریلیز اچ ݙسایا ڳئے جو جمع کیتی ڳئی امدادی رقم متاثرہ خانداناں کوں کھاݨے دے 50 لکھ پیکٹس دی فراہمی، 9ہزار خانداناں کیتے گھراں دی تعمیر تے سکولاں دی بحالی کیتے استعمال کیتی ویسی، ایں توں انڄ بینک آف امریکا چیریٹیبل فاؤنڈیشن دی صدر ایبونی تھامس پاکستانی سفیر دے خط دا جواب ݙیندے ہوئیں آکھیے جو فاؤنڈیشن پاکستان دے سیلاب متاثرین کیتے عارضی پناہ گاہواں، کھاوݨ پیوݨ دیاں چیزاں ، نقدی ،حفظان صحت دیاں چیزاں ، ٻالاں دی بقا دی کٹس ، روزی روٹی دی امداد اتے ہنگامی لیٹرین کٹس سودھے 3لکھ ڈالر دی فوری امداد ݙیندی پئی اے ۔ انہاں آکھیے جو تباہی ویلھے ردعمل دے امریکی عزم دے ھک حصے دے طور تے اساں پاکستان اچ سیلاب متاثرین دی وختی مدد کریندے پیوں۔
