اسلام آباد – 07 سيپٽمبر (اي پي پي)ملڪ ۾ تازين برساتن ۽ ٻوڏ سبب ٿيل فوتگين جو مجموعي تعداد 1343 ٿي ويو، 12 هزار 720 ماڻهو زخمي ٿيا، سڄي ملڪ ۾ 11 لک 32 هزار 572 گهرن کي جزوي نقصان پهتو جڏهن ته 5 لک 60 هزار 789 گهر مڪمل تباهه ٿي ويا، نيشنل ڊزاسٽر مينيجمينٽ اٿارٽي (اين ڊي ايم اي) طرفان تازين برساتن ۽ ٻوڏ سبب ٿيل جاني ۽ مالي نقصان جي باري ۾ جاري ڪيل تازي رپورٽ موجب چوماسي جي برساتن ۽ ٻوڏ سب وڌيڪ 18 ماڻهو زندگي جي بازي هارائي ويا، گذريل 24 ڪلاڪن دوران سنڌ ۾ 14، پنجاب ۾ 2، آزاد ڪشمير ۽ خيبرپختونخوا ۾ هڪ هڪ فوتگي ٿي آهي، ان دوران زخمي ماڻهن جو ڪل انگ 17 رڪارڊ ڪيو ويو، تازين برساتن ۽ ٻوڏ سبب سڄي ملڪ ۾ هن وقت تائين مجموعي طور تي 1343 ماڻهو فوت ٿيا، سنڌ ۾ 536، ڪي پي ۾ 290 ماڻهو زندگي هارائي ويا، بلوچستان ۾ 260، پنجاب ۾ 191 ۽ ڪشمير ۾ 43 ماڻهو فوت ٿيا، رپورٽ موجب سڄي ملڪ ۾ 591 مرد، 269 عورتون ۽ 474 ٻار زندگي جي بازي هارائي ويا، رپورٽ موجب سڄي ملڪ ۾ 14 جون کان هن وقت تائين ڪل 12 هزار 720 ماڻهو زخمي ٿيا، سنڌ ۾ زخمين جو تعداد سڀني کان وڌيڪ 8321 ماڻهو رپورٽ ٿيا، پنجاب 3858، ڪي پي 361 جڏهن ته بلوچستان ۾ 164 ماڻهو زخمي ٿيا، رپورٽ موجب گذريل 24 ڪلاڪن دوران پنجاب ۾ 766 ۽ سنڌ ۾ 78 ڪلوميٽر رستي کي نقصان پهتو، سڄي ملڪ ۾ ڪل 6579ڪلوميٽر رستو تازين برساتن ۽ ٻوڏ سبب متاثر ٿيو، ان کانسواءِ گذريل 24 ڪلاڪن ۾ وڌيڪ 5356 گهرن کي نقصان پهتو. سڄي ملڪ ۾ 11 لک 32 هزار 572 گهرن کي جزوي طور نقصان پهتو، تازين برساتن ۽ ٻوڏ سبب ڪل 5 لک 60 هزار 789 گهر مڪمل تباهه ٿي ويا، رپورٽ موجب سڄي ملڪ ۾ 81 ضلعا تازين برساتن ۽ ٻوڏ سبب اڃان تائين متاثر آهن، متاثر علائقن ۾ برساتن ۽ ٻوڏ سبب مختلف واقعن ۾ 7 لک 51 هزار 145 چوپائي مال کي نقصان پهتو آهي.
