بیجنگ۔17اکتوبر (اے پی پی) نگران وزیراعظم انوار الحق کاکڑ آکھیا جو پاکستان کیتے چین نال برادرانہ تعلقات توں ودھ تے کوئی رشتہ اہم کائنی، اساݙے ݙوپاسہ خصوصی تعلقات تے پاکستان اچ قومی اتفاق رائے اے۔ پاکستان کہیں کوں وی پاک چین تعلقات کوں متاثر کرݨ دی موکل کائنا ݙتی ویسی۔ سی پیک ہک گیم چینجر منصوبہ اے جئیں پسماندہ اتے کمزور طبقے دی سماجی تے اقتصادی ترقی دی راہ ہموار کیتی۔ اے چین اتے پاکستان وچال تزویراتی اعتماد کوں نشابر کریندے۔ اے ڳالھیں انہاں منگل کوں چین دے دورے وچال چینی تھنک ٹینک اتے سکالرز توں خطاب کریندیں ہوئیں آکھی۔ نگران وزیراعظم آکھیا جو ایں ݙوپاسہ مباحثے اچ شامل تھیوݨ انہاں کیتے ٻہوں اہمیت رکھیندے اتے اے مباحثہ اوں ویلھے تھیندا پئے جݙاں چین پاکستان اقتصادی راہداری دے ݙاہ سال پورے تھی ڳئن۔ وزیراعظم آکھیا جو پاکستان اتے چین دی دوستی ہر موقع تے ثابت قدم رہی اے۔ وزیراعظم واضح کیتا جو پاکستان کہیں کوں وی اساݙے ڳھاٹے تعلقات کوں متاثر کائنا تھیوݨ ݙیسوں۔ سی پیک پاروں گزریل ݙاہ سالیں اچ پاکستان دا سماجی معاشی منظر نامہ بدل ڳئے۔ گلگت توں کراچی اتے گوادر دی بندرگاہیں تئیں پاکستان دی سماجی تے اقتصادی لینڈ سکیپ اچ تبدیلی آئی اے۔ انہاں آکھیا جو اساں سی پیک توں فیدہ چاوݨ کیتے نویں سانجھے داراں کوں خوش آمدید آکھݨ کیتے تیار ہیسے۔
