لاہور۔14ستمبر (اے پی پی) پی ڈی ایم اے پنجاب ساوݨ مینھ دے 11ویں سپیل دا الرٹ جاری کریندے ݙسایا جو 16 توں 19 ستمبر تئیں پنجاب دے اتلے علاقیں اچ مینھ وسݨ دا امکان ہے۔ ترجمان موجب پی ڈی ایم اے صوبے دے کمشنرز اتے ڈپٹی کمشنرز کوں الرٹ رہݨ دیاں ہدایات جاری کر ݙتن۔ ڈی جی پی ڈی ایم اے عرفان علی کاٹھیا آکھیے جو ساوݨ مینھ پاروں ندی نالیں اچ طغیانی دا ݙر اے۔ وزیراعلیٰ پنجاب دی ہدایت دے پیش نظر کمشنرز، ڈپٹی کمشنرز اتے ٻئے افسران الرٹ رہن۔ ایں حوالے نال محکمہ صحت، آبپاشی، تعمیر و مواصلات، لوکل گورنمنٹ اتے لایئو سٹاک کوں وی الرٹ جاری کر ݙتے ڳئن ۔ انہاں شہریاں توں اپیل کریندے آکھیا جو خراب موسم دی صورتحال اچ احتیاطی تدابیر اختیار کرن۔ ندیاں دے اطراف اچ اکٹھے تھیوݨ اتے سیر و تفریح توں بچن۔ اندھاری تے طوفان دی صورتحال اچ محفوظ علاقیں اچ رہن، غیر ضروری سفر توں بچن۔ ایمرجنسی صورتحال اچ پی ڈی ایم اے ہیلپ لائن 1129 تے رابطہ کرن
